市場熱線：靜候大市見底訊號

尋日港股走勢認真肉酸，滬綜指與恒指做民航公司——「全日空」，外圍唔精神，加埋朝早滙豐出五月中國製造業指數（PMI）預覽值，跌到十個月低位，見51.1，市場話數據反映中國製造業仲係擴張階段，可是力度不斷減弱，即使唔使解畫，都估到係中央落重藥整治通脹的連鎖反應，製造業廠家面對水緊加上原材料價格急升，叫緊救命所致。

陰霾密布先靠邊站

恒指低開257點，用把間呎度一度大約以三十度角向下，到收市都唔見似樣反彈，最後跌488點，成交得650億元，10日線23,092點得而復失，吹水專家個個話下一站睇22,500點，可是短期大市搵唔到半個可能出現利好消息，係咪跌多兩舊可以停步，真係未敢樂觀，現階段宜靜候見底訊號。

2,100億銀超額王米蘭站（01150），收報2.77元，首日大升六成六，中籤者雖然唔夠買個LV，都可以食餐豐富晚餐。另一邊廂，連日被洗倉股仔遇正跌市，就更加無運行，東岳（00189）再插10%，相信捧場客唔使幫襯買雪種，都由心度寒出嚟，保利協鑫（03800）跌7.6%，旭光（00067）跌2.2%，路邊社消息話有幾個QDII基金為應付贖回潮，是狂掟幾隻新資源股嘅始作俑者，去到尋日連其他鬼佬基金都終於頂唔順加入戰團，洗倉洗到幾時？相信至少要等成交縮番落嚟，不過這類基金股咁跌法已經五勞七傷，醫番都嘥藥費當睇少隻好過。

中央要打通脹，造成通街借唔到人仔，惠及有牌放數佬遠東宏信（03360）及中國信貸（08207）成為逆市奇葩，尤其後者在歐洲股神入股的消息刺激下，升3.7%。兩間公司，一間專做機械租賃，後者就只收磚頭作抵押品，承做短期貸款月息3至6厘，計番年息36至72厘，唔使篤計數機都計到利錢有幾深，有云時勢造英雄，相信半年前都唔係好多人想像到，人行住銀行唔准借錢，會衍生到放貸公司生意做唔切。

水泥股靜極思動，大行消息話五月份四川水泥價格又創新高，比對上個月升8%，消息刺激水泥股低位拗腰回穩，展望進夏季用電高峰期，電力供應不穩，加埋4萬億人仔基建啟動龐大需求，水泥價格在年初傳統淡季唔跌，踏入第二三季大有條件再創新高。

潤泥備受大行睇好

華潤水泥（01313）三月初出成績表後，股價強過一輪，由6.5元炒到最高8.18元，隨着四月中市況轉落，上周五最低見6.7元，重返起步點，但昨日有再發力迹象。華潤系在藍籌中一門三傑，潤泥會唔會成為阿四乃後話，但近年發展之快有目共睹，水泥價格做好及產能提升，去年賺20.4億銀，升1.02倍。大行估新廠落成，潤泥今明兩年純利達35.5億及44.9億銀，同華潤電力（00836）去年49億已十分接近，展望水泥價格出現二輪升浪的話，短期潤泥再被唱好機會唔細，可留意。

古勝