孖妹缸湖遊：辣炒港股 印度散戶授藝

印度籍散戶Sadhwani.A.C.年屆78歲，已移居本港嘅佢有約40年投資經驗，自從第一次投資開始，一直都只係買賣港股，平時搵開同為印度人、有20年投資港股經驗嘅信誠證券經紀Kishore Jhangiani幫佢做買賣。

S：港股散戶Sadhwani.A.C.

K：信誠證券經紀Kishore Jhangiani

穩買靚藍籌 貼市跟炒

祺祺： 究竟你哋係幾時加入港股散戶嘅行列o架？

S： 我喺七十年代開始投資，當時港股嘅上市公司數目好少，市場開始急速發展，用一、兩千蚊就買到股票。當時香港製造業好興旺，我做出口生意，包括將內地及日本製造嘅貨品出口到中東，賺到嘅利潤就拎嚟投資。我第一次買嘅股票係從事鐘錶業務嘅寶光實業（00084），依家嘅股票投資組合中亦只有港股。咁多年嚟，我投資港股嘅經驗都好愉快，仲賺到啲錢，雖然市場有時有啲似賭博，但好似長和系及中電控股（00002）呢啲股票就好穩健，我依家每日都會落證券行坐兩、三個鐘頭，通常每周都會落盤。

　K： 我有個朋友喺證券行做經紀，佢喺20年前帶我入行，我就開始買港股。佢教曉咗我乜嘢股票係值得買，好似滙豐控股（00005）及新鴻基地產（00016）呢啲都係好藍籌。我會留意20隻最活躍港股，通常一日內會短炒幾轉。

睇好恒指可重越24000

高妹：你哋點睇港股後市去向？

S：因資金氾濫，我幾睇好港股走勢，相信大市成交額會慢慢回升。香港係自由市場，歐美資金湧入嚟後要搵出路，依家利率低企，房地產價格又過高，資金最後都會流到股市。

K：雖然恒指喺過去3周係咁跌，不過我估計港股喺未來數周應該可以突破24,000點。

祺祺：你哋可以話將成副身家都押注喺港股，又咁睇好個市，咁你哋最鍾意投資邊啲股份？有冇心水推介？

S：銀行股較穩健又有息派，所以我特別睇好，滙控、恒生銀行（00011）及建設銀行（00939）嘅前景相信都會亮麗，如果滙控真係喺上海國際板掛牌，亦會利好恒生嘅表現。

K：中海發展（01138）早前由約13元滑落至8元水平，我相信好快就會重上10元。另外，由於本地樓市熾熱，我仍十分睇好新地，該股應該會上試124元。

語言無障礙 獨立分析

高妹：聽講印度人嘅心算好厲害，仲可以即時計算出雙位乘數，係咪真o架？

S：有人話印度南部嘅人可以做到，聽講佢哋聰明啲，計數精啲，我就唔得喇。不過我嘅數學都唔差，有商業學士學位。

K：大部分印度人計數都好叻，尤其係新一代，佢哋投資好犀利，我啲仔女都有買港股。

祺祺：語言不通會唔會成為你哋投資港股嘅障礙？

S：唔會喎，只要有一個精通英語嘅經紀就得啦！我以前同依家一樣會落證券行，喺電視上見到邊隻啱心水嘅股票就會買，香港嘅通訊好發達，要投資好容易，稅率亦較美國、澳洲及歐洲國家為低。我有時都會靠聽朋友消息及睇報紙買股，不過依家年紀大，怕影響視力，少咗睇報紙囉。

K：我都係靠睇電視及報紙揀股票，然後自己分析，而我哋公司嘅分析員亦會提供意見。

無懼「坐艇」 炒輪都掂

高妹：你哋有咁豐富嘅投資經驗，可唔可以過兩招必勝技法畀大家？

S：我憑經驗揀股，從投資錯誤中吸取小教訓，冇試過犯大錯。我嘅投資通常較長線，有時揸貨幾個月，甚至揸一、兩年先沽，例如喺5元入貨後，若股價跌至4元，我唔會賣，只會繼續持有，仲會低撈溝貨，股價可能會喺3、4年後重返家鄉，不過亦試過入貨後，嗰間上市公司之後破咗產。

祺祺：咁多年嚟，你哋有冇輸大錢嘅不快經歷？

K：以前除咗銀行股之外，我亦都有買地產股窩輪，試過喺兩年內不斷買賣槓桿逾10倍嘅地產股窩輪，恒地（00012）係其中一隻相關資產，最後勁蝕50萬元！依家我多數買新地輪及滙豐輪，仲會喺跌市時買恒指Call輪博反彈。

84.5%估米蘭站首日爆升

本港新股「超購王」米蘭站（01150）將於今日上市，你認為首日掛牌可升多少？據今期《東方日報》網上民調截至上周六晚上6時嘅結果顯示，有24.1%人認為可爆升一倍或以上，14.9%人估計會升51%至99%，30%人料升20%至50%，15.5%人估升幅只有20%以下，其餘15.5%人就認為首日股價只會持平，甚至跌穿招股價。

高妹、祺祺

若有料報畀高妹同祺祺或有嘢問，可電郵money.biz@opg.com.hk