市場熱線：大唐新能源諗得過

重創股蟹貨大增

近期基金股認真冇運行，日日都幾乎有三兩隻被洗倉，上周五中國聯塑（02128）失驚無神隊11.4%，恐怖在收市後完全聽唔到任何特別消息，而季績麻麻的中芯（00981）亦再跌10.2%，四月底開始的升浪正式宣布玩完。旭光（00067）及東岳（00189）兩個難兄難弟分別插8.5%及7.5%，路邊社消息話原來有中資背景對沖基金，沽清手上新資源股，消息真定假都好，大成交隊落去，短期蟹貨重重，再向上炒恐怕唔係短時間可以實現。

史上最強六合彩有三個幸運兒各得四千幾萬，今時今日香港呢筆錢話少唔少，話多亦唔多，單係睇周末賣緊的新樓盤，統統呎價過萬，中六合彩想豪啲買特色單位，住落隨時無銀交管理費。

眼見屋仔市升唔停，最近愈來愈多人建議復建居屋同限制非香港居民買樓，唔少內地人透過投資移民取得香港身份證，亦有團聚的配額每日150個，加埋大量來港營商開公司的內地人，點界定港人與非港人，難度已經高，再者牽一髮而動全身，一旦熱錢退卻出招太狠，好似八萬五咁製造一批樓蟹，到時社會想河蟹都難！

本來建居屋、增加公屋供應可幫到低收入一群，無奈高官們擺出一副等夠鐘的模樣，前金管局總裁白頭任，上星期罕有咁轟港府樓市政策，身為中國金融學會執行副會長，評論會唔會反映中央意思，跑緊馬仔的下任特首熱門，應該好好想想。

講番股市，今年係「十二五」開局年，加埋福島核洩事故，中央叫停核電審批，新能源股應該有更大的發展空間，上市快半年的大唐新能源（01798），上市大部分時間潛水，宏觀環境配合，自二月見1.85元低位後，近期股價穩步做好，上周五收報2.33元，剛好企喺招股價水平，亦可以反映短線客的沽盤，已經消化得八八九九。

短線具影子效應

母公司是知名內地電企中國大唐集團，子憑母貴，公司主攻開發及營運風電場，以風電裝機容量排名全國第二，業務遍布內蒙古、遼寧、吉林、黑龍江、河南、河北、甘肅、上海及山東等地。

早前公布的第一份成績表超額完成，賺4.56億人仔，比預期不少於4.05億人仔高一成二，一一年市盈率14倍左右，未來五年中國經濟發展重點係節能減排，國策支持，又有母公司撐腰發展其他可再生能源項目，寧買當頭起，加上華能新能源（00958）重新上市，大唐新能源有影子效應，重上招股價後諗得過。

戰報

中國聯通（00762）+10%

古勝上周三推介嘅聯通，上周五升至16.66元高位，以推介日低位15.1元計，都賺逾一成。

達芙妮（00210）+10%

達芙妮繼續有追捧，上周五高見7.5元，較小尾周二推介時低位6.78元，累積升幅超過一成。

古勝