上市公司嘅年報一向會公布董事及管理層嘅薪金，絲絲以為公布嘅總收入就係「淨袋」嘅金額，但原來內地銀行有個特別做法，銀行高層員工係有「延期支付嘅規定」，以建行（00939）及農行（01288）為例，主要管理層去年實收嘅人工，原來只及年報公布嘅七成左右，而另外三成係要延期至之後一年支付。
按建行嘅年報公布，董事長郭樹清嘅182.6萬元（人民幣‧下同）人工當中，有128.6萬元係去年「落袋」，餘下53.9萬元要按以後年度嘅經營情況延期支付。農行董事長項俊波嘅情況亦一樣，年報公布佢嘅人工係175.84萬元，但當中喺去年「落袋」嘅只有124.62萬元，餘下嘅51.22萬元亦係延期支付。類似情況亦發生喺建行及農行多位執行董事或高級管理人員嘅身上。
不過「延期支付嘅規定」並不適用於非執行董事，就好似大家熟悉嘅金管局前總裁任志剛，佢作為建行非執董所獲嘅15.8萬袍金，就已全數收取。
佘絲韻