商業大廈好多時會因應業主身份或命名權嘅改變而需要改名，租客固然要印過晒啲卡片，作為上市公司就要做多樣嘢，就係出公司通告。絲絲近日見到好幾間上市公司出通告話更改營業地址，查實原因係香港蜆殼公司已遷出時代廣場。
歐舒丹（00973）、星獅地產（00535）、李寧（02331）、東瑞製藥（02348）喺香港嘅主要營業地址都係時代廣場蜆殼大廈。香港蜆殼早喺九六年租咗該廈近4萬方呎樓面，攞埋命名權，佢哋喺○二年開始將個別部門遷至青衣，消息人士話，隨着香港蜆殼新租約本月屆滿，為省卻更多成本，早前佢哋已將部分部門遷至東九龍。既然大租客走咗，蜆殼大廈就簡單咁改名為時代廣場二座。
絲絲記得幾年前有一單大廈改名嘅官司都幾有趣，話說白花油（00239）總部位於灣仔告士打道200號11樓嘅自置物業，大廈一向名為新銀集團中心，有間BVI公司話攞咗呢幢大廈嘅命名權，要將大廈易名為銀基中心，白花油堅決反對，理據係佢哋喺世界各地嘅註冊商標，都以「新銀集團中心」作為註冊地址。於是白花油選擇打官司，○七年底由高院開始，至○九年中到終審法院了斷，結果白花油獲得最後勝利。
佘絲韻