依家好多香港人行街、坐車都拎住部智能電話係咁篤，尋日絲絲撞到銀通副總經理曾憲求（John），原來佢哋剛啱與英國公司萬匯泰合作，推出流動支付服務，絲絲梗係要八吓佢哋有乜嘢大計啦，阿John話佢哋想搞個智能錢包，嘟一嘟就可以畀錢，希望最終發展到喺電話裝個軟件就可以畀錢喎。
絲絲見阿John講到咁High Tech，就問吓佢用緊乜嘢電話，佢話都係用iPhone，不過就仲係3GS，因為佢比較念舊，所以唔換新款喎！佢平時都有行吓唔同嘅展覽，睇吓有乜嘢新技術可以應用，今次與萬匯泰合作都係咁樣傾番嚟。
講吓講吓，其實阿John都係IT人，佢初入行時喺香港電訊（電盈（00008）嘅前身）做Sales，做咗兩年就轉去銀通做，一做就做咗廿幾年。佢話自己個性比較衝動，與IT人好有耐性完全唔同，但年紀開始大，先至開始有番啲耐性。
佘絲韻