證監會行政總裁韋奕禮喺下月八日就會同香港Say Goodbye，近期唔少人輪住同佢Farewell，佢嘅接班人傳聞亦甚囂塵上，會繼續由「老外」揸旗抑或改由「本地薑」接棒，相信係全中環以至「金魚缸」全體人士都好想知道嘅事。
據接近政府消息人士話，證監會行政總裁遴選程序仍進行中，依家已進入「最後四強」階段，當中有外國人亦有中國人，但以「老外」數量佔多。
據絲絲了解，傳聞中嘅熱門候選人、現任證監會副行政總裁張灼華亦喺四強之內，不過佢要擊敗一眾對手，真係唔容易。
換言之，證監會行政總裁一職「鹿死誰手」，仍要睇最後階段四人嘅表現。遴選委員會由今年二月成立，並進行全球招聘，至今已有近3個月，期間面試咗好多人，包括有來自主要市場監管機構嘅要員。
依家遴選工作已進入倒數階段，政府都希望快啲有決定，邊個最終會跑出，最快喺本月底就有定案。
有分析話，咁多外國人對呢個位感興趣，一來係由於人工較當地監管機構為高，二來可以攞吓中國市場經驗，之後返到老家就大把世界。
揀「老外」抑或中國人，完全視乎政府嘅取向，「老外」比較中立，唔受財團影響，冇利益關係的確係優點，但佢哋又未必受控制喎，而且對香港亦未必抱有長遠發展嘅心態；至於搵中國人做，理據當然係咁重要嘅監管機構職位，冇理由搵外國人擔任。要喺當中取得平衡，真係好難喎。
佘絲韻