市場熱線：超大似醞釀動作

祖國移動（00941）消息好壞參半，好消息係傳聞同蘋果公司傾引入iPhone5，九月或有佳音云云；壞消息係公司大幅削減高端用戶收費，顯示競爭白熱化，ARPU勢必受壓。

祖國移動應冇運行

古勝尋日先講，中電信（00728）傳推CDMA iPhone，半年都唔見下文，祖國移動將引入iPhone5嘅消息幾難炒得起可想而知。反觀高端用戶群消費下降，對其收益影響較大，故見技術上股價雖超賣，但仍彈唔起，宜留意68至69元係過去兩年嘅重要支持位，一旦失守下一支持區要落到63至65元。

今年首家錢莊調高P按息，銀行打開門口做生意，眼見樓市泡沫愈趨嚴重，衡量過樓按業務風險與回報，調高H按及P按息係無可厚非。之不過，呢期面不改容入市掃新盤嘅多屬內地疊水同胞，唔係靠借銀行水炒賣，上會亦唔志在多付些少按息，所以即使其他銀行跟風加P按息，對冷卻樓市炒風作用唔大，反而真正用家要上車就真係難上加難！

QQ（00700）又有新搞作，斥資六億多元入股內地旅遊服務網站藝龍旅行網16%股權，係近月第二次戰略投資。呢類戰略投資主要係睇眼光，博本小利大，十單刁有一半開花結果經已算係相當唔錯，開唔出花嘅即使全數撇帳對公司整體影響亦有限，相信類似嘅「播種」行動陸續有來。

中央繼續緊盯房產市場，並不斷抽走市場資金，內房同內銀股暫難成氣候。之不過，國策對農業嘅扶持絲毫未受動搖，相反，喺嚴控通脹嘅大前提之下，中央要確保農產品價格穩定，就得加大力度落實扶農惠農政策，農業股表現有望跑贏大市。

受惠重視食品安全

另外，近期不斷傳來有關內地黑心食品嘅報道，堂堂大國居民難以找到安全食品，係一大諷刺，故中央決心打擊黑心食品製造，加強執法，並積極推動食品製造行業改革，加快產業化、標準化及現代化步伐，農業股乘股市融資之便，只要經營得法，確實有錢途。

超大現代（00682）喺內地蔬菜行業已建立領導地位，近年旗下生產基地面積穩步增長，加上受惠於水利改革，主營業務有可為，而估值長期偏低，某程度已反映分屬民企所背負嘅風險溢價。超大股價由三月低位3.94元反彈，上到5.2至5.3元區域有阻力，之後再回試4.5元承接，底部支持上移，近半個月喺5元邊徘徊，似醞釀新動向。

早前公司擬發行優先票據，但因應市況而擱置，唔排除會另謀融資渠道，炒高批盪係其中一途，可以留意搭順風車嘅機會。

戰報

華建控股（00479）+13%

古晨上周一話華建整固完成可追，於當日低位0.77元上車，至尋日高位0.87元食胡，賺近13%。

中國油氣控股（00702）+16%

帥哥上周一推介嘅中國油氣尋日搶高至0.5元，跟佢於當日低位0.43元上車，最多賺逾16%。

古勝