美國聯邦政府嘅資料披露，美國總統奧巴馬兩公婆身家介乎280萬至1,180萬美元（約2,184萬至9,204萬港元），當中佔最大部分係美債，睇嚟就算美國發債水平剛啱喺本周一「到頂」，聯儲局嘅次輪量化寬鬆措施（QE2）就快收檔，奧巴馬仍以身作則向美債投下信心一票！
受惠於美債升值，奧巴馬夫婦嘅身家較○九年時介乎230萬至770萬美元大有進帳。資料顯示，奧巴馬分別持有100萬至500萬美元嘅美國國庫券，以及100萬至500萬美元嘅美國國庫票據；此外，佢亦持有價值介乎25萬至50萬美元嘅摩根大通股份。睇番總統先生去年嘅退稅資料，佢兩公婆扣除退稅後嘅可徵稅收入係130萬美元。
反觀副總統拜登夫婦就並冇大手持有美債，佢哋有介乎24萬至89.4萬美元嘅資產投放喺互惠基金、人壽保險及存款證，佔身家最大部分嘅係特拉華州一所可租賃住宅物業，價值介乎10萬至25萬美元。
(余絲韻)