好多人都話好難與「八十後」溝通，恒生（00011）嘅管理層亦面對呢個問題，絲絲尋日與一班「賓卡」傾偈，知道恒生專登搞咗個Course畀管理層，教佢哋點樣面對「八十後」員工。
恒生商務理財業務總監左玫（Rose）同絲絲講，話佢哋聘請嘅管理培訓生（Management Trainee）唔單只有「八十後」，嚟緊畢業嗰批仲有「九十後」。恒生企業及商業銀行業務主管陳力生（Nixon）就話，佢哋有Course教管理層點樣與呢班「Generation Y」相處，好多時都要遷就吓佢哋嘅要求。
早前絲絲都聽聞有啲公司遇着任性兼冇責任感嘅「八十後」，真係辛苦到寧願自己做番啲嘢，有啲幫人做招聘嘅公司，甚至要教啲大企業點樣In呢班後生仔。
絲絲覺得呢啲Course可以令到管理層認識一下「八十後」，互相了解，學習點樣相處都係一件好事，培訓完啲人才出嚟可以留得住，唔好浪費公司資源嘛！
(余絲韻)