美聯集團（01200）尋日開股東會，出現咗驚險鏡頭，喺重選五名董事嘅議案，就有兩人爭啲唔夠票要被踢出局。
呢兩位董事分別係美聯嘅開國功臣張錦成及葉潔儀，兩人攞到嘅票數分別約有五成六及五成二，換言之有超過四成人反對佢哋返回董事局。
據接近消息人士所講，今次投票嘅結果並非針對張、葉兩人，而係小股東及基金都想帶出一個訊號，就係投資者想間公司做好啲。睇番美聯嘅股價由最高九個幾，跌到依家五個幾，即係話股東嘅資產冇咗四成以上，投資者有意見係好正常。
張、葉二人係主席黃建業嘅直系親信，尤其係張錦成幫手打下美聯嘅江山，雖然期間曾離開自立門戶，但近年返嚟幫公司重整業務，可謂對舊僱主有情有義。今次有咁多股東對佢哋投反對票，都算用心良苦，希望管理層接收到呢個訴求，努力做番好業績提振股價，咁就大家開心啦。
(余絲韻)