絲絲講場：滙控環球銀行上京開大會
滙控（00005）環球銀行及資本市場旗下嘅環球銀行，每年都會開幾次管理層委員會會議，絲絲聽聞佢哋喺本周三及周四又開會，仲首次去北京搞，有成30幾位行政人員去，個個都係阿Head，包括來自中東、新加坡及拉丁美洲等，坐埋一齊好似聯合國咁。
滙控「策略日」剛啱先至話要發展大中華市場，咁快揀去內地開會，都唔知係咪咁啱嘅？睇番今次出席嘅主力人物，包括滙豐環球銀行及資本市場亞太區主管馮婉眉、環球銀行聯席主管Robin Philips及Kevin Adeson等。
王冬勝：內地星洲增聘
絲絲尋日八到，滙豐亞太區行政總裁王冬勝（Peter）開晒口話，未來5年會喺中國及新加坡聘請超過2,000名員工，香港方面唔會裁員，亦唔會關閉分行，睇嚟佢哋真係好大決心要發展大中華市場。
至於下周五嘅滙控股東大會，將票決新花紅方案，絲絲聽聞有一間叫Pensions & Investment Research Consultants Ltd.（Pirc）嘅顧問公司，叫啲股東投反對票，話新方案令董事會話晒事喎。
(余絲韻)