市場熱線：聯通現價可跟進

對於近日跌市，坊間有唔少傳聞，但相信實情只係魚缸缺水，現貨交投淡靜，造就機會讓期指戶興風作浪至真。試諗諗，以今時今日港股嘅市值，一日得嗰六百億銀成交，真係傳統基金撤資就唔係咁嘅樣，更何況一貫「聞風先動」嘅投行們仲咁積極包攬IPO活動，唔見得係大淡友，所以古勝都係用一顆平常心看待上落市。

外資投行唱好A股

事實上，確實有愈來愈多迹象顯示內地「水緊」情況轉趨嚴峻，前日內地Shibor七日拆息抽升104.4個基點至4.5983厘，尋日再升至4.6375厘。魚缸淡靜，企業融資唔容易，內房股恒大（03333）選擇向香港地主出讓內地項目套現5億美金，名義上係為項目搵多個拍乸，實際上當然係同此刻眼前金更重要有關。

對於債務包袱重者，當今「缺水」日子當然唔好過；但對於有銀士，則可能係部署未來六至十二個月倉位嘅好時機。若然內地安度呢兩、三個月緊日子，通脹見頂回落，屆時宏觀調控可高舉「勝利」旗幟，嗰時就係A股發圍嘅時候。難怪近周投行「高佬盛」先後兩次唱好A股，而里昂更將年底滬綜指目標定喺3,800點，即係話現水平入市目標回報超過三成，信不信由你！

內地幕牆製造商遠大中國（02789）昨首日掛牌，由於此前已務實地因應市況大幅調低招股價，中籤者有水位可走，最終收報1.66元，較招股價升10.6%。全城熱爆嘅米蘭站（01150）打破天津港（03382）嘅紀錄，超額倍數達2,180倍，假設首日掛牌股價升五成，咁好彩中兩手者，利潤夠幫襯佢買番個二手名牌包包，呢單大龍鳳搞到咁巴閉，真係抵佢名留青史！

3G制式擁先天優勢

講開新股，從事電源及數據線產銷業務嘅鉦皓控股（08132）今日掛牌，由於係全數配售，貨源歸邊，加上晒士唔大易於炒上，值得關注。

在下一向係聯通（00762）嘅捧場客，聽講今日公司將正式宣布引入WCDMA制式黑莓手機，初期可能會先喺北京、上海、廣州三地推出，此舉勢必令當地3G市場競爭更趨激烈。聯通勝在喺制式上擁有先天優勢，數據亦顯示，祖國移動（00941）繼續捱打，中電信（00728）則受制於遲遲未能推出CDMA版iPhone而一籌莫展，預期三者之中，聯通可繼續領跑，年內股價有條件再創新高，趁近日回落至15元邊，又可以留意上車機會。

戰報

中國金融國際（00721）+17%

帥哥本月五日睇中嘅中金國際，尋日高見0.57元，以推介日低位0.485元計，累升逾17%。

康師傅（00322）+9%

古晨尋日推介嘅康師傅逆市呈強，吼中於低位22元上車，至全日高位24元，即日食胡賺逾9%。

古勝