孖妹缸湖遊：波浪理論教測市

前排天朗氣清，本來啱晒性格開朗嘅孖妹外出，但港股結束八連跌後仍無起色，綁到成身「蟹貨」嘅我哋仲邊有心機吖！為咗逃離「買親股票都輸」嘅厄運，我哋走入香港理工大學，搵企業發展院《股市投資技巧深造班》講師梁小鷹惡補技術分析，順便緬懷一下做學生嘅日子，大家跟埋入嚟上堂啦！

梁老師喺七十年代開始研究波浪理論，結合順勢操作分析市況，測市戰績相當彪炳。佢喺九八年接受本報訪問時，根據波浪理論，預期若恒指未上試9,797點，就會下試6,464點，結果恒指當年真係大跌至6,544點低位，都咪話唔犀利！

梁：香港理工大學企業發展院《股市投資技巧深造班》講師梁小鷹

短線見底上望26000

高妹：波浪理論由「推動浪」及「調整浪」組成，依家港股行緊乜嘢浪？

梁：「推動浪」推動港股重上32,000點，我認為係唔可能發生，雖然個別股票升越○七年高位，但冇可能所有股票都重返當時水平，依家係上落市，按照「波浪理論」基本概念，「推動浪」係以數字表達，「調整浪」就以英文字母表達。睇番恒指周線圖，有括號嘅英文字母係有圈英文字母嘅子浪，佢哋本身亦有子浪，例如（b）有5個子浪（a至e）。e浪及（b）浪可能喺上周「黑色星期五」已同時完結，大家可以喺現水平吸納。恒指當日嘅日線圖出現「錘仔」（看好嘅陰陽燭形態，顯示強力支持，下影愈長買壓愈大，若長達燭身逾5倍可能單日轉向）反映短線見底，若守穩22,800點可進一步確認，可反彈約1,000點，理論上將邁向26,000點至（c）浪，若升唔穿25,000點，仍可能應驗「五窮六絕七翻身」。

難望爆升吼公用股

祺祺：點解依家個市升唔郁？

梁：我對後市睇得唔太樂觀，升市要符合多個條件，包括國際因素。○七年牛市恒指爆升係受惠於「港股自由行」，大量新資金湧入港股，好多人願意揸股票，可能係因為市場當時期望喺○八年奧運豐收，而國語「奧運」與「好運」發音相似，炒股氣氛好熾熱，大市日均成交好快由幾百億推高至逾1,000億元。不過呢啲情況依家唔會再出現，咁好嘅環境係十年一遇，目前如果要有咁嘅升勢，需要有比○七年更多嘅資金，當然個別股份仍有可能表現亮麗。當港股攀升，大戶會諗辦法震散戶「落車」，所以個市想升都升唔到，今年應該係上落市，因為唔夠錢炒上。

高妹：咁我哋應該點樣部署？

梁：港股一個月波幅約有1,000至1,500點，升幅逾1,500點就係單邊市，可考慮喺跌市收集往往穩升嘅公用股，例如中電控股（00002）、中華煤氣（00003）、電能實業（00006）及港鐵公司（00066）。我唔建議投資本地地產股，因為高盈利時期已過，而且今年八字欠土，地產應該唔多掂。不過大陸通脹高企，內地銀行及保險公司會借錢出去做房貸，利好內地樓價，房地產冧市對政府冇好處，所以內地樓價應該唔會大跌，我哋可考慮喺內地置業。

順勢而行果斷撈貨

祺祺：有冇啲睇市技法係一定準架？過兩招畀大家啦！

梁：睇圖表要睇到有種沉迷嘅感覺，要睇幾萬個鐘頭先會開竅！不過市場由所有參與者合組而成，基於多方面力量嘅較量，預測準繩度只能有70%。好似喺圖表中，陽燭後再出陽嘅機會有70%，陰燭後有70%機會出陰；除咗陰陽燭外，仲可以睇短期平均線，好似若10天線或20天線升，翌日股價或指數升嘅機會都有70%。致勝嘅關鍵首要係順勢而行，唔可以先存偏見，如果將錯誤維持太耐就會觸礁，當肯定預測係違背市況，要隨時修正；當發現逆勢，喺股價跌5%以內就要止蝕。想賺錢就要「在別人恐慌時貪婪」，你要喺人諗住睇定啲嗰時入貨，喺（股價或指數）大升時沽貨，大跌時考慮入市。

高妹：早前金價有回落迹象，仲有冇力上衝？我家姐明年結婚，到時金價會唔會更高？使唔使打定啲金先？

梁：睇番倫敦金價圖，金價喺730美元水平出現「墓碑」（看淡嘅陰陽燭形態，上影係唔被市場接受嘅價格區，若長度等於燭身5倍以上，市況可能會單日轉向），反映沽壓強，但平均線仍不斷趨升，所以金價升唔停。