市場熱線：海隆歸邊易踢上

呢排個市點反覆唔使多講，淨係商品價格已經坐過山車，大戶對賭沙塵滾滾殺錯良民，上周五港股亦夠離奇，總成交金額654億元仍然相當奀，但恒指期貨成交增到86,210張，有傳係大戶挾淡倉，亦有傳祖國大戶平淡倉食胡，但未平倉合約不跌反升令人懷疑。

魚缸短線難捉摸

啱啱祖國喺上周四晚突然加RRR，中港魚缸喺「黑色星期五」唔使再驚周五效應，但到下晝至轉弱為強，滬綜指升27點，有懷疑係咪有春江鴨活動。有「半直通車」之稱嘅港股ETF獲准年底喺祖國推出，到時或有資金流入，但照計唔會咁快炒定。祖國加RRR同本地錢莊加按息有裙帶關係，收市後大笨象（00005）即加H按半厘，但周末二手樓交投承接賣地效應依然旺場。

另一離奇嘅係美股上周五死因不明，夾硬搵原因係驚希臘要債務重組，希臘財困就要畀多啲利息，畀多啲利息就愈財困，所以債務重組的確係遲早嘅事，但點解到依家先識驚？睇落係套息交易拆倉作怪至真。

富士康（02038）被踢出恒指，股價跌到新低，做藍籌做得五年，反映工業股淨係做代工已唔掂，而工業股近期最靚係ASM太平洋（00522），市值已去到440億元，有機會進身藍籌。下隻會被踢出局嘅大熱門係思捷（00330），上周五一度跌穿30蚊創新低。

風水輪流轉，水泥股驚產能過剩高處不勝寒；食品股靜極思動，康師傅（00322）首季業績亦唔錯；飛機股炒重組，但H股升、A股跌；旭光（00067）連續兩日坐過山車，先係傳有股東低價沽貨，跟住公司出通告否認之後股價回升，收市後SDI真係有股東以每股2元減持嚇人一跳，但原來係舊年尾已公布過嘅股東貸款協議，不過，隻股有咁多股東兼啱啱過咗半年禁售期，要預咗有排震盪。

古勝不嬲話新股最重要係貨源歸邊，最近亦有個例子係海隆控股（01623），最低跌到2.2元震走晒啲貨之後，跟住幾乎日日升，上周五收報2.94元。其實炒起亦有蛛絲馬迹，公司喺上月尾獲包銷商行使超額配發權，以每股招股價2.6元行使60球，宣布後股價先插兩日再升，包銷商唔係傻仔，擺明有計！

油商有開採意欲

海隆係做石油設備行業，包括油田、鑽桿同塗層業務，照計同油價有一定關連，近排油價跌穿100美金，應該對行業稍為負面，不過油價喺呢個水平已令油商有足夠開採意欲。公司最近有單新聞係得日商51萬美元嘅塗層合同，金額只係好奀，但海隆話佢哋係第一間攞到日本塗層業務嘅中國廠商，而且話會爭取同間日本鋼鐵工公司進一步合作，咁樣令人有好大想像空間。

戰報

中國財險（02328）+13%

高仁上周三話財險中線睇11元，豈料周五已升至11.14元，以推介日低位9.85元計，已賺逾13%。

新海能源（00342）+12%

古晨上周一推介新海能源，幾日間抽上高位1.82元，於推介日低位1.63元上車，最多賺近12%。

古勝