滙控（00005）新任主席范智廉及行政總裁歐智華正式上任後，尋日搞咗第一個「策略日」，係○七年以來首年舉行，滿臉自信嘅歐智華話，上一次舉行嘅「策略日」只係為時兩粒鐘，今次朝9晚7、做足全日嘅「策略日」真係破天荒，除咗考驗管理層嘅應對能力，投資者亦要打醒十二分精神。
全球聚焦滙控「策略日」，歐智華話想年年都搞一次，加上滙控以後每季都有詳盡財務數據嘅經營狀況聲明，以及中期、全年報告，咁就可以畀全球投資者睇住成個集團嘅發展及策略進度，透明度又會提高。
尋日約有100人參加「策略日」，包括分析員，投資者及評級機構代表，其中有超過一半係投資者，包括首20大股東全部到齊，有分析員就千里迢迢由香港飛去英國直擊；另外，仲有約30位本港及英國主要傳媒人員，面對面與歐智華、范智廉、集團財務董事麥榮恩討論佢哋嘅未來策略，三大管理層都從容不迫面對，無懼刁鑽問題，充滿自信。
佘絲韻