市場熱線：中海石化展新升浪

壓物價搵路費開刀

四月祖國CPI係5.3%，仲高過預期，睇怕就快加存款準備金率實走唔甩，下個月加息嘅機會亦大。本來諗住上個禮拜商品價格暴跌會減輕吓通脹壓力，但商品拿拿臨又好快升番，金價重上1,524美元，油價每桶103.5美元，加埋之前一日嘅出口數據咁勁，阿爺今次又要「三率齊發」。

阿爺要壓制物價可能要搵路費開刀，前排「菜賤傷農」單嘢，經過調查後話物流費用太貴係元兇之一，內地傳媒打蛇隨棍上，用「高速公路暴利超過房地產」做文章。其實祖國高速公路收費站太多同太貴已嘈咗好耐，前排阿爺打算要公路減價、但批准更長經營年期去交換，跟住冇咗下文，但公路減價嘅壓力會愈來愈大。

米蘭站（01150）招股熱到爆，勝在細細粒容易炒，連帶鐘錶珠寶股亦有唔少人捧場，先施錶行（00444）狂升24%，景福（00280）同香港資源（02882）亦分別升6%同8%，遲啲「趴打」等三個國際名牌都會來香港上市，呢類股今年有排炒。

光大國際（00257）有阿媽大手筆增持，尋日回升5%，管理層喺上月股東會之後亦話今年係收成年，所以呢隻應係長線投資佳選，公司未來最有潛力業務應該係垃圾焚燒發電，因為根據「十二五」規劃祖國嘅垃圾發電量會提高幾倍，光國可以逢低吸納。

尋日中化肥（00297）發威大升12.7%，但另一化肥股中海石油化學（03983）卻微跌，其實講過去兩、三個月嘅表現，中海石化好過中化肥好多，中化肥係因為鉀肥價格近期回升而得益，兼有追落後嘅味道。

糧食增產有利化肥

中海石化係一間好公司，喺金融海嘯期間仍決定依照原定計劃起海南甲醇二期工程，項目舊年尾投入商業營運，撞啱油價升到咁高，甲醇毛利率大幅上升9.2個百分點至34.3%。而集團今年資本開支達到20億，主要用喺湖北磷肥、山西尿素同黑龍江項目，湖北嘅50萬噸磷肥項目會喺今年底完工，而公司亦打算收購煤礦，希望用自產煤替代天然氣以減低成本。

化肥股嘅最大概念係阿爺下令今年糧食要增產到1萬億斤，但早排菜價大跌，又撞着好多地方有旱災，令人懷疑化肥嘅需求會唔會減少，但好彩上述嘅影響只係短期性。中海石化現價往績PE22倍，預測PE約15倍，呢三個月股價走勢都好平穩，等整固完成後應可迎接一個新升浪。

戰報

中國伽瑪（00164）+15%

詩詩尋日推介中國伽瑪果然有料到，炒上全日高位0.335元，以低位0.29元計，即日鮮賺逾15%。

中國貴金屬（01194）+16%

古晨上周四推介中國貴金屬，尋日高位做1.94元，以推介當日低位1.67元計，食胡又賺逾16%。

古勝