俗語有云靠人不如靠己，喺大陸營商識中文係着數啲，掌管480億美元嘅私募股權公司TPG Capital據聞呢排喺市場物色緊亞洲區主席人選，但先決條件係要識講普通話先有得傾喎。
絲絲即刻打電話畀老友──TPG大中華區聯席主席王兟問吓乜嘢情況，點知佢話自己成日飛嚟飛去，剛啱先落機返到香港，完全唔知公司搵緊亞洲區主席呢個位。據聞今次TPG請亞洲區主席，主要係幫公司喺大陸搵投資項目，唔識講普通話都幾難做好呢份工，如果你係金融界才俊，又識普通話嘅，依家機會到啦，TPG雖然已面試咗幾個人，但仲未敲定人選，千祈咪執輸呀！
講起TPG，都有幾多金融界猛人喺佢哋度做㗎，除咗曾被資本市場喻為「收購先生」嘅王兟之外，聯想（00992）前副總裁馬雪征以及○二年率領新橋入主深發展，開創外資收購中國上市銀行嘅單偉建亦做過高級經理人，不過兩人都喺去年跳槽，睇嚟資本市場真係好需要中國人才。
余絲韻