滙控（00005）尋日首次公布季度經營狀況，焦點落喺行政總裁歐智華身上，佢與傳媒傾業績狀況時，提得最多嘅人名唔係主席范智廉，亦唔係佢自己，反而喺滙豐亞太區行政總裁王冬勝（Peter Wong）。
傳媒及投資界好關心滙控亞太區業務，歐智華回應幾句後，都會補番句：「詳細資料等Peter Wong遲啲補充」，可見佢對Peter相當倚重兼器重。咁又係嘅，滙控首季稅前盈利亞太區佔逾65%，加上Peter對亞太區業務瞭如指掌，當然成為歐智華嘅左右手。
今次係滙控破天荒以季度形式公布咁多經營狀況，但仍有美中不足之處，就係嗰份「經營狀況聲明」中文譯本錯漏百出，例如第4頁嘅「資產息差」寫成「資產息產」；最離譜係第6頁嘅「除稅後利潤」寫成「除稅前利潤」，好彩絲絲有睇英文版本，不然真係計錯數都唔知。
絲絲記得，去年滙控公布中期業績時，中文譯本亦有錯漏，當中講派息政策嘅翻譯明顯有差異，搞到公關姐姐要漏夜致電絲絲澄清。滙控業務出咗名多，覆蓋國家又多，涉及好多數字，要做到百分百無誤，真係要打醒十二分精神先得。
余絲韻