絲絲講場：希慎股東會 米飯班主掀罵戰
依家係上市公司開股東大會嘅高峰期，亦即係小股東向管理層問嘢嘅黃金機會，尋日絲絲去咗收租股希慎（00014）嘅股東會，有小股東踴躍提問本來係好事，點知就令到其他小股東不滿。
不滿獨佔發問時間
事緣有位小股東向管理層提出關於公司嘅債務水平、匯兌風險等問題，喺連環發問後，另一位小股東「火起」，唔滿意該名小股東「獨霸」發問時間，又嫌其問題雞毛蒜皮兼浪費時間，隨即兩人「互片」，更有其他小股東加入罵戰，就連新任非執行主席利蘊蓮都冇符，最後要勞煩在場嘅工作人員維持秩序，先至擺平事件。
類似上述嘅情況喺其他股東會亦有發生過，但喺希慎就較為罕有，以往嘅股東會，希慎小股東多數都係有讚冇彈。經絲絲了解後，連串發問嘅小股東只係關心公司嘅未來發展，而唔係專登「踩場」。
此外，絲絲仲八到希慎喺銅鑼灣嘅新場─希慎廣場雖然要明年先開幕，但管理層就話，會引入本港依家較少有，甚至從未進駐嘅商戶，相信到時各位好姊妹又多一個「血拼」嘅好地方喇。
余絲韻