港交所（00388）未來有幾個超大型Project，好似場外結算、設備託管服務、提升資訊技術系統以及興建新一代數據中心等，全部都屬於高難度，「難度分」起碼有80分！港交所尋日就公布新增設集團行政管理總監職位，主要職責係做好各個大型項目嘅協調工作，監督項目嘅實施，直接向行政總裁李小加匯報。
港交所搵到曾經係Chi-X Japan代表董事嘅馬俊傑（Joseph Meyer）出任呢個重要職位，佢以前主要工作係推出買賣日本上市股票嘅另類交易系統，預計佢將會喺下月底履新。
李小加話，港交所嘅《戰略規劃2010-12》就快到中期階段，面前有好幾個重要工作項目，全部都需要公司上下通力協作，並希望將項目對參與者、其他權益人以至集團現有業務運作嘅干擾減至最低。馬俊傑喺金融服務業有30年經驗，相信佢一定能勝任新職，新職位將負責監督主要項目嘅實施，管轄行政管理部及人力資源部，並為高層管理委員會成員。
馬俊傑喺加入Chi-X Japan前，曾出任新生銀行喺東京嘅機構銀行部營運總裁、德意志資產管理紐約保險資產管理業務全球營運總裁以及德意志證券東京股票部營運總裁，並曾經喺大摩嘅香港、紐約及東京分公司出任多個不同職位。
余絲韻