絲絲講場：普爾遜旗艦對沖基金跑輸同業跌眼鏡
唔少美國企業交出亮麗嘅首季成績表，加上聯儲局將繼續維持低息政策，利好投資氣氛及股市表現，帶挈對沖基金業亦有唔錯嘅表現。不過，有「賺錢之神」之稱嘅著名基金經理普爾遜，佢旗下管理近90億美元資產嘅旗艦對沖基金Advantage Plus唔單止未收復年初至今嘅失地，更跑輸業界平均表現，真係令人跌晒眼鏡。
年內錄1.7%虧損
由普爾遜管理嘅Advantage Plus四月份回報只有0.1%，本年迄今更錄得1.7%虧損；由彭博社編製、追蹤2,772隻對沖基金表現嘅彭博社整體對沖基金指數，由三月份嘅126.21點升至四月份嘅127.99點，創下自○八年六月以來嘅新高，令業界本年迄今嘅回報增至3.7%。相比之下，普爾遜嘅旗艦對沖基金表現明顯較同業遜色。
好彩嘅係，普爾遜旗下嘅另一隻對沖基金Credit Opportunities四月份錄得1.4%回報，本年迄今回報亦增至7.8%，令佢挽回唔少面子。
余絲韻