絲絲講場：任總開壇速爆額
中國貨幣及匯率政策呢個課題，真係長講長有，中外專家偉論多多，但講到香港人最想聽嘅，都係金管局前總裁、現任中國金融學會執行副會長任志剛嘅分析，所以佢一話喺中文大學開壇講學，已空前爆滿，據聞已有近300人報咗名兼畀埋錢喇。
100蚊入場益街坊
絲絲當然唔執輸，一早已報名留位，不過絲絲嘅姊妹就好漏氣，仲未報名，到時惟有執死雞，睇吓有冇人No show啦！如果出席率達100%，姊妹們話企位都冇所謂喎，希望到時中大方面要開大啲冷氣，免得發生焗暈事件。
主辦單位搞呢個講座都算係益街坊，因為只係收100蚊入場費，認真抵到爛，對比中大全球經濟及金融研究所舉行嘅全球金融菁英領導研討班嘅收費，就真係平到笑，之不過菁英班無論係講者以及畀錢參加嘅「學生」嘅陣容，就當然係強好多啦。
余絲韻