喺一片證券交易所合併聲中，港交所（00388）成日畀人質疑點解唔搵個對象「聯婚」，好彩呢種壓力唔係一面倒，澳洲會計師公會做嘅調查，就力撐港交所唔使跟風搞合併。
環球交易所掀起合併潮，例如澳洲交易所及新加坡交易所建議合併，紐約泛歐交易所被納斯達克及Intercontinental Exchange（ICE）聯手敵意收購。雖然紐約泛歐交易所已拒絕收購，澳、星交易所「聯婚」亦被澳洲政府反對，但已證明咗各交易所求變求強嘅決心。
好彩港交所堅決「唔嫁」（或者「唔娶」）亦獲得支持，澳洲會計師公會喺上月做咗個調查，對象係277名本港專業人士，當中六成受訪者反對港交所與另一交易所合併，主因係佢哋認為依家有龐大嘅中國企業來港招股，亦有能力吸引唔同地區嘅企業來港上市，所以預計香港唔會因為合併而受惠。
絲絲睇完份報告亦有同感，因為港交所代表香港金融市場，同人合併隨時變「阿二」，冇咗話事權。
余絲韻