通天酒業（00389）主席王光遠對各式各樣嘅酒都好熟悉，對於公司旗下嘅出品就更加瞭如指掌，佢話佢哋有隻「通天野玫瑰山葡萄酒」好啱絲絲飲，皆因可以令人「零距離」。
王總話呢隻酒係用生長喺長白山嘅野玫瑰花，加埋長白山一帶緯度介乎41至43度盛產嘅靚葡萄釀製而成，如果與女士去跳舞，飲一啖可以將雙方距離拉近，飲多幾啖直頭係「零距離」呀，事關呢隻酒易入口、清甜兼有玫瑰花香味，女仔一定鍾意飲。
佢話中國有成千家葡萄酒公司，大部分係跟法國生產傳統葡萄酒嘅方式，通天會行一條有自己特色嘅路，承襲咗中國人早期飲葡萄酒嘅口味，即係比較甜嘅傳統。佢哋所產嘅大部分紅酒都保留咗葡萄嘅天然甜味，仲有一種係低乙醇，酒精度數唔夠1%，好啱女性市場，加上女性佔咗消費市場嘅主導地位，佢哋唔憂銷路之餘，仲冇乜競爭對手添。
新上任兩日嘅總裁王曉鳴就話，佢喺金六福酒業及通化葡萄酒公司都做過，先後將青春及熱情獻咗畀呢兩家公司，依家嚟到通天，會結合以往嘅青春、熱情、智慧及能量，喺呢度好好發揮喎。
余絲韻