置富產業信託（00778）啱啱出咗今年首季業績，物業收入淨額賺咗成1.61億元，佢哋尋日喺中環IFC商場嘅某間海景酒吧搞咗個酒會暨簡報會，主席趙國雄及副行政總裁趙宇兩父女仲即席「一唱一和」娛賓。
話說喺酒會期間，趙國雄主動向分析員報喜，話上次股東會通過咗擴大投資決議案，令公司除咗可投資商場，仲可以投資寫字樓，對於佢哋日後收購商場項目增加咗彈性。講講吓阿女趙宇加入，以下就係佢哋嘅談話內容。
趙宇：「有記者問點解唔喺返我哋嘅場做酒會，我就話呢頭方便啲囉。」
趙國雄：「除咗方便啲，其實我哋都係順便嚟睇吓場，睇吓呢個商場值唔值得買。平日嚟好似太高調，依家可以慢慢睇得清楚啲。」
趙宇：「咁你覺得呢個Harbour view（海港景觀）得唔得呢？」
趙國雄：「唔……嗰度（指東面近碼頭）會起嘢，有少少遮擋。都係向嗰面（西面）好啲。」
某分析員：「呢度回報率可能冇4厘喎？」
趙國雄：「（對住阿女）咁你壓吓價啦，（對住分析員）佢壓價得o架！」
以上內容當然純屬搞笑，兩父女講得咁風騷，全因佢哋旗下商場首季加租幅度平均有17.4%。趙國雄話，當中以地產代理舖租加得最勁，加租一倍以上都唔肯走，睇嚟今年嘅零售市道唔會差得去邊喇。
余絲韻