近日有消息話，證監會位於中環遮打大廈嘅辦公室喺二○一三年租約到期時，有機會搬去即將完成重建嘅銅鑼灣希慎廣場（即係以前嘅興利中心），消息一出，唔好話證監會內部，就連市場亦議論紛紛。
絲絲聽聞，行政總裁韋奕禮喺前日下晝即時發咗電郵畀員工以定軍心，話有機會搬去希慎廣場嘅消息「純屬揣測」，選址仲未落實。證監會係本港證券及期貨嘅監管機構，本港其他金融監管機構好似金管局、港交所（00388）以至政府總部都設喺中環心臟地帶，所以若證監會搬離大隊，的確係叫人意外。
但話分兩頭，證監會依家有兩個辦公室，一個喺遮打大廈，另一個喺李寶樁大廈，喺運作以至溝通上的確存在不便，搵一個大啲面積嘅Office容納晒所有員工，的確非常需要。
不過要喺中環搵一個大面積嘅Office幾有難度，一來租金貴，二來好多大型商廈已租出。再講，證監會喺遮打大廈嘅租約於○三年簽訂，當時經濟唔好，一簽就10年（先以5年為期，約滿後再續約5年），但依家嘅經濟如何，唔使講，續租時租金叫價肯定好乸脷。
仲有一樣不得不提，喺雷曼事件後，苦主成日走去遮打大廈示威，證監會高層更試過要坐貨升降機，因此保安亦係證監會選址嘅一個重要因素。
余絲韻