市場熱線：中燃炒作理由多

恒指收市微跌53點報23,261點，國指則跌58點，全日牛皮冇乜波幅，成交得674億元。不過，尋日的確有唔少股有起色，連內房股打鑼打鼓有新調控都照樣反彈，而電力設備股、藥業股、飛機股同水股最標青，電力設備股承接前日升勢，原因已解釋過，藥業股慶祝今日上海藥業（02607）開始招股，飛機股炒油價下跌，水股則話有污水處理扶持政策出台。

成渝概念細水長流

跌得多嘅有石油股同鐵路股，鐵道部第一季已蝕咗37億人仔，鐵路投資唔縮皮至奇，南車兩母子（01766及03898）應驗升得多、跌得痛嘅道理，兩「鐵」（00390及01186）亦創新低。尋日工程機械股離奇被插，龍工（03339）同中聯重科（01157）分別跌6.3%同3.9%，樂觀啲睇，可能係先行回落，養精畜銳等三一重工上市時再發力。

尋日祖國正式批准「成渝經濟區區域規劃」，重鋼（01053）同成渝（00107）A股分別升停板同升4.5%，但H股就冇咁癲。成渝經濟區概念耐唔耐就翻炒，唔使問亞貴，成都同重慶未來幾年經濟好景，重鋼、成渝、亞泥（00743）等都會受惠，但屬於細水長流，唔係短炒一、兩日就冇影。

遠大中國真係減價到1.5元上市，PE10倍唔夠大平賣，上藥嘅PE係23.1至27.55倍，當然PE高低係睇行業。不過，A股有隻姚記撲克獲批上市就有幾多話題，公司賣花讚花香預測年年高增長，但依家嘅消閒活動係一部手機或手提電腦就可隨時打機、睇電視、睇戲，唔同三十年前有副啤牌就係最大娛樂。

古勝呢兩個月經常有講隻中國燃氣（00384），前排卒之搞到股東之一嘅海峽金融攤牌，雖然最後都起事失敗，但中燃股價亦由3.88元高位大幅回落，禮拜二跌到最低3蚊後搵到個底，尋日拿拿臨上到3.23元收市。有人話逢親公司有不明朗因素就應避之則吉，但古勝則覺得有內亂更適宜搵食。

股權爭奪仲有下文

中燃其實呢兩年成績表都唔多好，百幾個項目但同收益唔成正比，但賺錢能力係一回事，插咗旗就成為有價值資產，因為每個地方只可以有一個燃氣商，所以好多燃氣公司呢幾年都搏命插旗，而中燃本身亦被插旗，中國、南韓、阿曼、印度同台灣股東陣容鼎盛，原本嘅領導人劉明輝下落不明，唔出現股權爭奪戰至奇。早排有消息話華燃（01193）有興趣，跟住又傳中石油（00857）或昆能（00135）想爭，其實要喺內地發展，搵中資大後台係正路，而劉明輝批貨落喺邊個手上，嗰個就自動成為大股東，而海峽金融意興闌珊，亦好大機會賣股，劇情發展可能峰迴路轉，總之就有得炒！

戰報

金保利新能源（00686）+13%

古晨周三推介金保利新能源，尋日抽高至1.58元，以推介當日低位1.39元計，兩日已賺逾13%。

中國通信服務（00552）+8%

股博士上月二十日推介嘅中通服走勢強，當日低位4.64元上車，至昨日高位5元計，帳面賺8%。

古勝