絲絲講場：王帥廷離潤電做中旅CEO
華潤電力（00836）尋日宣布，主席王帥廷辭任公司執董、董事會主席等職務，由集團董事長宋林重掌所有職務，由即日起生效。王總好大方咁開咗個記者會話畀大家知，佢獲中央任命出任香港中旅集團行政總裁，將會喺五一勞動假後返工。
屬於央企嘅香港中旅集團係旅遊業龍頭，王總嘅職務相當於副部級，照咁講即係升職啦，唔怪得絲絲尋日問佢要離開有乜嘢感覺時，佢答話「好高興」啦！
王總原本喺政府工作，九四年華潤集團投資興建佢哋嘅首個電力項目──徐州電廠，王總就入咗去做廠長，之後業務愈做愈大，佢就嚟咗香港華潤總部幫手，一做十幾年。總結喺潤電嘅工作，佢話「好滿意」，但都好遺憾依家被調走，事關如果再畀啲時間佢，佢會做得更好。
余絲韻