絲絲講場：盧韋柏臨急抱佛腳
絲絲尋日參加咗花旗與港大合辦嘅大學銀行課程畢業禮，見到咁多大學生，當堂覺得自己後生晒，估唔到花旗環球個人銀行服務行政總裁及總經理盧韋柏（Weber）亦有同感，佢仲諗番起以前喺港大聖約翰學院嘅讀書生活。
Weber話今次返母校令佢諗番起住Hall嘅日子，當時佢成日掛住打波，臨考試前先去溫書！
唔知佢係咪覺得咁講會教壞啲師弟師妹，所以即刻兜番，叫大家唔好學佢咁，要好好地溫書喎！聽聞班學生仲有兩星期就要考試，唔知有幾多個會好似Weber咁呢？
花旗第七年搞課程
講番尋日嘅畢業禮，有四十六位學生完成咗三個月課程，聽聞呢個課程今年已經係第七年搞，要培養學生嘅銀行知識，最緊要係教佢哋了解社會企業責任，對社會作出貢獻。
絲絲最有興趣嘅係，有四位特別優秀嘅同學會喺暑假去花旗紐約總部交流，聽到都羨慕死，點解絲絲讀書嗰陣冇呢啲課程呢？
余絲韻