絲絲講場：鄭海泉神元氣足
作為本港首隻人民幣計價新股兼全球首隻人民幣計價嘅房地產信託基金（REIT），匯賢（87001）掛牌可謂香港金融發展嘅里程碑，上市儀式冠蓋雲集，星光熠熠，就連久未露面嘅滙控（00005）執董鄭海泉亦親身撐場，絲絲見佢笑容滿面，氣色頗佳，睇嚟大家亦唔使為佢嘅健康過分擔心。
雙重身份滿場飛
滙豐有份參與匯賢嘅上市工作，鄭海泉亦係匯賢管理人匯賢房託嘅獨立非執董，身兼雙重身份，當然唔會缺席今次上市盛會，或者係由於久未露面，佢與其他「賓卡」及匯賢管理層喺整個儀式上都忙到不可開交，喺離開交易所之前，傳媒先至有機會同佢匆匆閒話幾句。
尋日滙豐香港區總裁馬凱博及國壽（02628）董事時國慶亦有出席儀式，除咗中國人壽（集團）之外，其他匯賢嘅創始股東亦有高層代表到場；監管機構方面，證監會主席方正、港交所主席夏佳理及行政總裁李小加亦當然有親自到場，見證呢個歷史時刻。
余絲韻