市場熱線：中興生意唔憂做

祖國物價大起大落，呢排突然話菜價大跌，搞到菜農血本無歸，阿爺即刻下旨要穩定價格。祖國畀通脹搞到頭痕，依家菜價下跌理應係好消息，但菜價跌穿成本價就會搞到冇人想種菜，到時供應不足又會再次價格暴漲，要「維穩」的確好難，因為有炒家興波作浪，今次班炒家自作孽累人累己。菜同生果價格下跌，受影響嘅股包括亞果（00073）、超大（00682）同中綠（00904），但中綠搞分拆又預期發日本輻射財，短線唔可以睇死。

零售股回吐後可吸

另外，上周五閉幕嘅人大常委會議並冇表決提高免稅額，似乎仍有好多爭議。零售股由四月初已炒提高免稅額同「五一」假期概念，早兩日開始腳軟，短線有機會獲利回吐，但祖國嘅消費者信心開始回升，等低位又可以吸納。

洛玻A股除咗頂ST帽即刻飛天，尋日再升停板到11.76元人仔，H股（01108）上周四亦升14.8%收報4.02元，但A股仍較H股溢價兩倍幾，信義（00868）同中國玻璃（03300）亦創新高，玻璃股升皆因浮法玻璃價格上升。而粟米加工股呢排亦好強，大成生化（00809）同西王糖業（02088）之後，中國澱粉（03838）上周四亦發威，祖國啱啱出咗個「暫停玉米深加工收購玉米增值稅抵扣政策」，孖屐解讀係限制呢類企業擴張。

中國燃氣（00384）今朝十點就開股東特別大會，古勝買定花生等睇戲，海峽金融唔忿氣兩個指派代表被炒魷，仲質疑公司用66倍PE買百江燃氣，但中燃引述證券報告話實質收購PE只係8.8倍，另有消息話佢哋已經有其他股東撐腰，好有信心夠票數通過議案。古勝上個月已叫買中燃，皆因睇中佢隨時爆發股權爭奪戰，有內亂正好搵食，好似國美（00493）內亂反而刺激股價道理一樣。

海外市場發展理想

中興通訊（00763）月初畀愛立信控告侵權，股價喺30蚊樓上高位即時回落約一成，但近日開始回升。雖然老古唔知誰是誰非，但好似蘋果公司告競爭對手三星類似，喺商業世界司空見慣。中興話晒呢幾年都係生意高峰期，淨係睇祖國三大電訊商今年首季嘅3G上客數字，就知道公司嘅手機同通訊設備今年嘅生意唔使憂。

祖國舊年先推出3G，用家同電訊商都會係試探性質，今年至係收成期，電訊商亦放心加大網絡設備投資，中興肯定係受惠者。另外，海外業務嘅增長亦唔慢，新興同成熟市場都要網絡升級，中興同華為齊齊喺巴西起廠搶佔新興市場，再加埋4G又就快發展，盈利會繼續保持高增長。中興今年預測PE約24倍，30蚊樓下都買得過。

戰報

美蘭機場（00357）+11%

股博士於本月十三日推介嘅美蘭機場起動，搶高至9.5元，較推介日低位8.52元，升逾11%。

大成生化（00809）+23%

古晨喺十五日睇中嘅大成生化果然有料到，抽至高位2.09元收市，較推介日低位1.7元，升近23%。

古勝