美國總統奧巴馬為期3日嘅削赤方案推銷之旅圓滿結束，喺標普日前恐嚇調低評級嘅陰霾下，總統先生自然要Sell得落力啲，推銷削赤方案嘅其中一站係社交網站Facebook（fb）位於加州嘅總壇，佢紆尊降貴親會一班年輕人。
當講到畀有技能嘅外國人攞美國簽證及創業時，奧巴馬當堂感慨起嚟，話希望美國會有更多格羅夫（Andy Grove）。格羅夫係邊個？咪就係匈牙利籍嘅英特爾（Intel）創辦人囉！奧巴馬話唔希望見到啲有智慧及雄心嘅人才，走去中國或法國創業喎。
奧巴馬準備明年競逐連任總統，時移世易，網民力量實在不可小覷，所以今次座談會搞埋網上直播。奧巴馬喺Sell削赤方案之餘亦不忘拉票，話會好似○八年選總統咁，再用fb做競選工具，難怪有人話今次搞座談會有宣傳fb之嫌。
為咗歡迎奧巴馬到訪，平時只穿T恤短褲嘅Facebook教主朱克伯格亦特登着番套西裝，仲打埋呔，奧巴馬話自己就係可令朱克伯格執到正嘅人。
喺座談會尾聲，朱克伯格向奧巴馬送上印有公司Logo的連帽衞衣，似乎係想提醒日理萬機嘅總統先生，百忙中都要抽時間輕鬆吓，最好梗係上網玩吓fb啦。
余絲韻