根據一項調查顯示，內地個人可投資資產達1,000萬元（人民幣‧下同）以上嘅有錢人，喺限購、限貸令之下，對投資內地房產嘅興趣大減，呢班富人為咗仔女以及保障財富，當中有60%想投資移民。
招商銀行與貝恩顧問尋日發布咗《2011中國私人財富報告》，對象係擁有1,000萬人仔做投資嘅群體。去年全國由個人持有可用嚟投資資產嘅錢高達62萬億元，呢班富人有成50萬人，預計今年會再多9萬人。
佢哋前年投資喺房地產嘅資產配置有17.6%，隨着中央打壓樓市炒風，呢個比率喺今年初就縮水至13.7%。90%人話唔會再買房地產，有一半人就話會逐步撤回投資房產嘅錢；其實只係唔買住家樓o架，佢哋轉咗去買商舖以及房地產基金。
有錢人愈嚟愈多，向境外投資移民嘅人數亦急升，過去5年，內地投資移民去美國嘅複合增長率高達73%。手頭上有成1億人仔嘅富人，27%人已經揸緊第二本護照，60%人正考慮移民，佢哋想仔女接受較佳教育、保障財富安全，並為未來養老做好準備。
（余絲韻）