阿里巴巴（01688）主席馬雲嘅管理哲學一大堆，最近佢喺清華大學演講，就話「唔相信有一流的人才，只相信有一流的努力」，佢又自爆食飯多咗反而愈瘦，以前讀書愈讀愈差，好彩有互聯網嘅發展，佢先至有今日。
馬雲小時候夢想係入讀清華北大，但最終考唔到。小學讀咗7年，中學讀咗7年，讀小學時佢係最好嘅小學生之一，後來幾乎冇中學肯收佢，參加考試更全軍覆沒。馬雲自言一無所有，亦冇一個有錢老竇，但好彩佢生於呢個有互聯網嘅時代。
絲絲都認同時勢造英雄，不過個人努力係唔少得。馬雲當然係勤力嘅人，就算開會食飯都好勤力溝通，佢笑言有啲商家愈食愈肥，佢就愈食愈瘦，皆因佢大部分嘅時間都係聽人哋講，或者講自己認為要堅持嘅事，所以根本冇時間食飯。
講到人才管理，佢有更多理論，例如「不相信有一流的人才，只相信有一流的努力」、「企業創新不是為與對手競爭，而是跟明天競爭」，佢自認唔係一流人才，但亦未至於去到四流。佢話阿里巴巴需要嘅係平凡嘅人，仲攞咗寫畀個仔嘅信嚟做比喻，佢喺信內送咗三個道理畀18歲大嘅仔：「永遠用自己的腦袋思考問題、獨立判斷；世界有很多解決不了的問題，所以要永遠保持樂觀心態；講真話，跟老爸講真話。」
（余絲韻）