市場熱線：卡姆丹克升勢未盡

港股升市但成交得724.9億元屬於偏少，但過埋今日就4日假期不能苛求，聯通（00762）長升長有，又升6%，尋日各類板塊升得幾全面，只係升得多嘅股票有回吐，如洛玻（01108）同六福（00590）等，洛玻A股炒除帽概念（ST特別板），A股炒到10蚊人仔樓上，但H股尋日升到3.88元後倒跌到3.5元收市。

魚缸新丁表現參差

海南三亞尋日開始試點離島免稅，第一日就出現瘋狂搶購，人山人海仲犀利過搶鹽，據講部分奢侈品的確平過香港，而上海浦東同浙江舟山亦想申請購物免稅，如果祖國多幾個呢類免稅點，香港零售嘅風光日子咪話坐定粒六。講到免稅，祖國將個人每月免稅額提高到3,000蚊人仔聽講就快初審通過，有機會喺下半年實施，但單消息已炒咗成個禮拜，所以零售內需股尋日表現只係普通；不過，減稅係對消費意欲有實質幫助，內需股有機會轉勢。

兩隻新股差天共地，唐宮（01181）第二日再升14.7%，泰凌（01011）掛牌就潛水16%，有上實醫藥招股在後，泰凌自必然蝕底。唐宮聽講喺北京招牌幾響，舊年祖國快餐連鎖店鄉村基喺花旗上市，結果炒到100倍PE，證明祖國講飲講食股好受芬佬歡迎。

上月放榜高峰期之後，又到第一季業績揭盅，孖屐算做有賞有罰，金風（02208）賺少17%即刻跌11.8%，卡姆丹克（00712）賺多逾3倍，尋日下晝倒升9.3%收報4.46元，再創新高。今日到隻經緯紡機（00350），尋日已炒高4.5%，另外可以留意隻峻凌（01997），之前已公布首季營業額升35%。

太陽能產品需求殷

講番卡姆丹克，份業績報告得幾句，總結係：營業額升60%，毛利升1.85倍，毛利率由17.2%升到30.5%，純利升3.11倍，原因是晶片價格上升同產能增加。太陽能晶片價格喺舊年下半年至起步，所以同舊年第一季比，當然係冇得比，不過，公司今年全年計相信仍有5成以上增長，一來核電危機刺激太陽能需求，二來阿爺唔再批准新產能，三來公司擴產。

卡姆丹克先排預告話有著名投資者入股，古勝之前以為係喺孖屐掃貨嘅大馬基金，依家揭盅係美國私募基金TPG，但唔係直接買股票，而係認購零息CB同窩輪，卡姆丹克尋日收市價已高過窩輪行使價8.8%，如果全部行使，公司可以集資11.7億銀，會用呢筆錢擴充產能。根據坊間預測，卡姆丹克今年預測PE係11.5倍，稍平過保利協鑫（03800）嘅13倍，有一定折讓係正常，創新高後應有餘未盡，可以睇5蚊。

戰報

金川國際（02362）+26%

帥哥周二話可冷敲金川國際，尋日炒高至3.8元，以推介日低位3.01元計，兩日已賺逾26%。

維奧集團（01164）+20%

詩詩上周五睇中嘅維奧果然有料到，尋日搶高至0.96元，於低位0.8元上車，短炒又賺兩成。

古勝