俄羅斯總統梅德韋傑夫剛剛訪問完香港，不過本地俄資企業「Icon」嘅俄鋁（00486）就並無沖喜作用，反而股價失守50日線，有見頂之虞。不過，由同鄉俄羅斯金礦公司分拆，於俄國從事鈦磁鐵礦開採嘅鐵江現貨（01029），表現就相當精壯，尋日更在大成交配合下逆市勁升9%，以全日高位2.16元收市，強勢盡現。
鐵貨主要在俄羅斯同中國東北地區開採同加工鈦磁鐵礦產品，雖然集團去年業績見紅，全年股東應佔虧損達8,235萬美元，但主要是因為旗下主要項目都是處於發展初期所致，但踏入今年，情況已開始有改善，集團日前就公布了今年第一季的營運資料，整體產量比去年第四季增長52%。
雖然鐵貨現價較上月低位1.47元已累升四成有多，或會嚇怕唔少畏高者，但從昨日成交達1億股，較周一大增近4倍，可見買盤相當強勁，技術上亦已進入無阻力區，強勢股不宜估頂，跟進目標2.5元，止蝕2元。
詩詩