早前絲絲爆料話「殼股高手」高振順（Johnson）做「白武士」，拯救瀕臨除牌嘅亞洲電信媒體（00376），Johnson一見到絲絲就投訴，話要幫佢澄清喎，搞到絲絲一頭霧水。Johnson話呢單料出街後，居然有人以為佢買起亞洲電視！
絲絲睇番當日呢單新聞，標題係亞洲電信媒體嘅簡稱「亞洲電媒」，可能有人冇睇清楚啦，不過又好難怪嘅，近年經濟好，接連見到城中買殼高人出手買嘢，例如「殼王」陳國強就買起咗TVB（00511）。
Johnson笑住話：「買亞視等於每日燒架賓士，我點頂得順呀？」亞視最出名係試過一年蝕3億幾，即係平均每日燒錢100萬元，唔係個個頂得順。Johnson買瀕臨除牌嘅亞洲電媒，未來會搞吓證券業務，絲絲一有消息就會向大家報料。
（余絲韻）