標普突然攞美國嚟開刀，搞到港股尋日大跌300幾點，但有一隻創業板嘅「股仔」光亞（08061），喺復牌後竟然一度暴升逾1.3倍，堪稱逆市奇葩。絲絲即時去𥄫一𥄫，原來光亞嘅印尼附屬引入咗私募基金CVC Capital Partners為股東，頓時點石成金。
大家一時間可能諗唔起CVC係乜嘢料，就由絲絲提吓大家啦。CVC嘅專業團隊內其中一位顧問，係透過意馬（00585）大搞「喜羊羊」嘅「紅籌之父」梁伯韜，至於CVC近期嘅大搞作，就係以14.25億元將鴻興印刷（00450）近三成股權賣畀日本人，大賺逾5億元。
由於CVC今次入股光亞附屬嘅模式，與○八年入股鴻興時相似，當然引起股民嘅期待。光亞股價尋日升52%，雖然最終喺升幅榜上輸咗畀大折讓供股嘅寶源控股（00692），但梁伯韜「點石成金」嘅威力仲係咁勁喎。
（余絲韻）