美國經濟表面睇係好咗，但失業率仲好高，經濟復甦之說真係見仁見智。美國白宮有項數字幾有趣，總統奧巴馬兩公婆去年收入大幅縮水近七成，係佢哋自○六年以來賺得最少嘅一年，主因係佢哋嘅圖書銷售下跌，係咪因為經濟唔好，少咗人買書呢？
奧巴馬一家喺○九年收入有550萬元（美元‧下同）以及交咗180萬元稅款，但去年收入及納稅額分別只有170萬元及45萬元，當中總統人工有40萬元，其他收入都係來自佢嘅圖書版稅，包括來自喺九五年寫嘅自傳《Dreams from My Father》及去年出版嘅兒童書《of Thee I Sing：A Letter to My Daughter》，但去年整體銷售少咗好多。銷售少咗可能與經濟有關，亦可能由於佢政績麻麻，國民對佢嘅支持率下降。
奧巴馬去年向36個慈善機構捐咗近25萬元，其中最大一筆嘅13萬元善款係畀咗Fisher House Foundation，呢間機構專為喺軍醫院接受治療嘅退伍軍人及軍屬提供免費或廉價住宿。
近期奧巴馬為咗令政黨支持佢提出嘅減赤方案，努力游說各界增加高收入人士稅收，佢帶頭喺去年交多咗1.2萬元稅款。睇嚟呢個行動含有政治成分多啲，不過點都好過淨係得把口講。
（余絲韻）