絲絲講場：保險界有個十人幫

猛人飯聚只限聯誼

絲絲咁後生，梗係唔識得呢批元老，查實係由保誠香港行政總裁容佳明（Derek）嘅口中得知呢個「組織」。佢話「十人幫」飯局最初由「保險教父」楊梵城、友邦香港名譽主席林文德等人發起，佢哋每隔一、兩個月都會聚一聚，輪流請食飯之餘，順便交流吓近況，呢個聚會只限聯誼，有乜嘢公事就留番第日返工至講。

據知「十人幫」之中仲包括有鄭文光、梁安福、劉鼎言等保險界猛人。

Derek話，「十人幫」內有9人都係「40後」，而佢就係唯一一個「60後」。講到新一代嘅「80後」，佢好感嘆咁話部分年輕人缺乏咗不怕磨煉嘅鬥志，或者因為依家生活條件好，年輕人習慣咗較好嘅生活環境，佢希望年輕人可以訓練吓主動解決難題嘅能力。

保誠香港增聘10%人手

當然，香港亦有唔少上進有為嘅年輕人，Derek話見到唔少員工喺工餘都會主動去進修。

講起人手，Derek話保誠喺香港嘅銷售團隊有5,000人，打算今年最少增聘一成人手；至於首季業務，佢就話就快公布業績唔方便講，但對於營運情況感到滿意。

（余絲韻）