標普評級棒一揮，不但降低了美國評級前景，亦「震散」歐美以至亞太區股市。港股連續四日跳，昨日更來個高台跳水，裂口低開176點後再插，跌至二萬三千五邊緣才稍為抖抖，失守20日線，不過成交進一步減至693億元的大半個月以來低位，市場情緒未至悲觀，氣氛偏向觀望。
今次美國評級展望被降的確令市場震驚，因美國作為全球金融中心，取決於評級的國債亦跟世界各種投資有着千絲萬縷的關係，任何風吹草動都影響深遠。而全球最大債券基金PIMCO早前已唱衰美債，又不斷減持，因其管理的資產高達逾萬億美元，對債市震撼之大不容忽視。
不過，他踩美債的同時，卻睇好亞洲區股市，更大手增持中國股票，對中國投入信心一票，聽到此話，大家都應該無咁驚。
高盛擺烏龍的日經輪事件，暫時未有任何正式解決的公告，但斷估高盛不會一如坊間所言輕易退出香港市場，因投行都係睇餸食飯，只要市場一日有錢搵，又怎會輕易放過，相信最終是賠錢了事。
中線走勢而言，恒指未脫上落市格局，波幅範圍大致是22,500至24,500點之間，近日調整未見大量資金撤離之下，衍生工具市場反映投資者偏向看好後市，繼上周五出現過1,563萬元資金流出恒指好倉後，資金迅即回補，本周一即有多至6,378萬元資金流入相關好倉，流出淡倉的就有2,895萬元。
一度升至兩年以來高位的聯通（00762），周一突破後見獲利盤，股價昨日跌逾4%，是表現最差的指數成分股，由上周二至本周一的五個交易日，共錄得445萬元資金流出其好倉，淡友部署成功。
港股累跌逾600點之後，有機會先行喘定，可投機博入Call輪，不妨留意恒指蘇皇購（29467），今年九月二十九日到期，實際槓桿12倍，行使價24,900點。
Handsome哥