市場熱線：雨潤食品穩中求勝

古勝覺得美股只係借勢調整，美金跌咗咁多亦係時候反彈。邊個唔知買美債等同龐氏式騙局？所以祖國亦想辦法減持，周小川話3萬億美金外匯儲備已經太多，應該要分散投資，但弊在走得去邊？所以金價又創新高，古勝本來年初對金價前景有啲懷疑，但此時此刻金價可能焗住升。

二三線股頻頻抽水

恒指開市已係最高位，20分鐘過後已跌超過300點，其後得幾十點窄幅上落，收市保得住23,500點樓上，牛皮市成交減少到低於700億元。藍籌股得QQ（00700）一隻微升，但二三線股表現絕對唔差，好多細價股趕住抽水，尋日又有兩間批股、兩間供股，亦有唔少發債或CB，追啲無端端上升股特別要小心，尤其有大行唱好隨時係陷阱，但部分抽完水後可以趁低吸納，老古尋日提到嘅齊合（00976）話咁快已逆市回升，而英皇鐘錶（00887）批股後亦先跌後回穩，其他鐘錶珠寶股更係逆市呈強勢，六福（00590）重上30蚊關口。

中芯（00981）亦抽水，向中投、大唐同台積電發優先股同認股權證，換股價只係每股普通股0.539元，呢次中投泵錢其實係有戰略意義。日本地震凸顯供應鏈問題，祖國半導體業落後幾班，其他國家又唔肯轉讓技術，中國惟有自己急起直追，但投資半導體廠郁啲都要幾十億，由中投泵水向中芯係正路，憑呢個概念中芯可以做強。

中國燃氣（00384）近期日日有新聞，海峽金融擺明車馬要搶控制權，又有消息話昆能（00135）亦有意搶埋一份，所以昆能尋日股價亦表現唔錯。

雙匯A股尋日復牌，一如所料跌停板，最慘係持貨者想走都冇得走，隻股有169隻基金埋堆，單計尋日基金持貨市值已唔見20億元，仲未計仍起碼跌停多一、兩次。雙匯出事之後，好多零售商都唔敢賣雙匯，最得益嘅肯定係競爭對手雨潤食品（01068），隻股尋日先跌後平收，不排除有資金從雙匯轉投雨潤懷抱。

乘機搶奪下游市場

或者有人質疑，雨潤近年積極發展嘅係上游屠宰業務，雙匯下游產品出事，雨潤就算有着數都未必食得晒。不過，經過咁多事故之後，阿爺要重視食品安全，所以先會將肉類屠宰交畀信得過嘅大企業，雨潤嘅市佔率可以迅速擴大。而公司相信亦會提高下游產能，雙匯今次難免元氣大傷，雨潤唔乘機搶地盤就笨。雨潤年年成績表都攞高分，有人話公司近年專注劏豬主要目的係為咗攞政府補貼，姑勿論係點，雨潤係一隻好穩陣嘅股，呢排個市回調，更顯得佢硬淨過人。

戰報

旭光（00067）+26%

旭光尋日再創高位3.61元，古晨早於本月四日已經推介，以當日低位2.86元計，最多賺逾26%。

合生元（01112）+17%

合生元尋日亦創上市新高14元，帥哥本月八日推介時低位為11.96元，跟到足亦賺超過17%。

古勝