內地通脹超標，人行昨日隨即出手調高存款準備金率，可以預期，但凡一切同個「價」字有關嘅項目，不論樓價、油價、物價等等，未來一段日子都會受到嚴密監控，亦為相關股份帶來額外嘅政策風險。相反，一些跟隨國策步伐嘅股份，例如環保、節能、新能源等，就唔會有呢樣煩惱，可以放心捧場。
生產電動自行車用鉛酸動力電池的超威動力（00951），股價自上月中低見2.55元後持續回升，上周五再升4.5%，以3.2元報收。集團早前公布去年全年純利2.68億元人民幣，按年增長32.83%，每股盈利31分人民幣。另外，集團亦宣布於江西省上高縣投資興建電極板生產線。有利好消息支持，難怪股價愈升愈有。
詩詩二月份亦曾介紹過超威，當日股價在2.7元樓下，短線目標3元，如今已經超額完成，但超威現價市盈率僅8.8倍，較同業天能動力（00819）嘅11倍低一截，若然估值同天能睇齊，超威股價可見4元，止蝕3元。
詩詩