孖妹缸湖遊：探究通脹股法自保

其實中國通脹問題嚴重已經唔係新鮮事，中央政府亦一早嚴陣以待，例如直接下達限價令，國務院總理溫家寶亦大大聲聲咁話：「保持物價穩定是今年宏觀調控的首要任務，也是最為緊迫的任務。」不過孖妹聽人講，話高通脹除咗影響民生，原來仲會打擊股市，甚至拖累某啲股票板塊嘅走勢。正所謂：「先求知，再投資」，孖妹對通脹嘅定義一知半解，炒股觸覺又未夠敏銳，一於搵財金專家補吓課先。

梁：星展銀行（香港）經濟研究部高級經濟師梁兆基

內地通脹壓力難紓

高妹： 我對通脹嘅認知真係得半桶水，只知道通脹係指一般物價水平持續上升，貨幣購買力就會下降，所以我成日都睇實CPI（消費物價指數）！

　梁： CPI只會話你知價格趨勢，而成本價格升跌亦係造成通脹嘅其中原因，因此PPI（生產價格指數）都係重要指標，但我唔明點解大家都會忽略。不過，要確切掌握通脹情況，就一定要睇成個經濟系統變化，例如工資增長、房地產價格等數據。

高妹： 你認為今年中國整體通脹水平有幾高？有人話如果CPI升到6%至7%，到時港股就會跌市喇。

　梁： 由於中央政府有出手控制，現時內地貨幣供應已大幅下滑，我認為通脹唔會失控，但亦唔會大降，原因係除咗食物價格因素外，亦有太多通脹火頭燒緊，加上實質利率仍係負數，我估計未來5年中國通脹率平均介乎4%至5%水平。另外，高通脹代表貨幣政策要繼續收緊，當收緊力度太強，就會令經濟增長大幅放緩，避險情緒升高，繼而令股市增加下跌機會。

儲備人幣增值良策

高妹： 嘩！估唔到通脹背後嘅學問竟然咁高深，但我見中國成日加息以及提高存款準備金率，唔通呢兩招就係打擊高通脹嘅絕招？

　梁： 貨幣政策重點係要具有前瞻性，以防止高通脹出現為例，其實只要早啲落藥，咁依家咪冇咁辛苦囉。加息主要用來調節貨幣及信貸供應，係抑制通脹及防止經濟過熱嘅重要工具；提高存款準備金率就用來調節貨幣需求，從而控制過盛嘅流動資金。

高妹： 咁你嘅抗通脹投資方法又係點呢？

　梁： 我從來都唔買股票，投資態度亦好保守。之前我有投資黃金，不過最近已經獲利離場，我覺得依家撲入市買金，值博率唔高。講真句，我睇唔到人民幣長遠會貶值，所以喺一年前左右，我就開始每日兌換兩萬蚊人民幣做存款，算係抗通脹嘅其中方法。

鄭：申銀萬國聯席董事鄭家華

買ETF資源股抗通脹

祺祺：上周內地公布嘅通脹數字達5.4%，高於市場預期，會唔會拖冧港股？

　鄭： 中央事前嘅放風工作做得好足，市場早已預計通脹數字可能偏高。中國政府只需象徵式做多一個動作，例如加息或提高存款準備金率，市場就冇大幅調整嘅藉口，只會係微跌後企穩。不過港股有好多上市公司都係國企，好似影響到民生嘅發電股，喺通脹升溫下會因加價受制而削弱盈利，若通脹持續攀升，會對恒指有直接影響。

祺祺： 細細個就聽啲老人家話，儲金可以保值，買金礦股可唔可以抗通脹？

　鄭： 買股票要承受企業嘅經營風險，金礦股只適宜短炒，唔適合啲想乜都唔諗嘅投資者，好似紫金礦業（02899）就因母公司涉及污染事件被起訴，股價一度受到拖累。買實金或ETF（交易所買賣基金）就比較好，可用嚟抗通脹又唔使日日睇。

祺祺： 好多人話買公用股或房地產投資信託基金（REITs）抗通脹最好。去年港鐵公司（00066）股價跑贏恒指升咗5.6%，全年派息增加13.5%至每股0.59元，依家喺通脹下，地鐵仲要加價，睇嚟港鐵股份真係要買。面對好似洪水猛獸咁嘅通脹，仲可唔可以靠其他股份趨吉避凶？

　鄭： 投資者可考慮吸納部分資源業龍頭股，如中國海洋石油（00883）及江西銅業（00358），油、銅呢兩種資源喺市場出現短缺，有機會擔當替代貨幣嘅角色，散戶可以喺未來一年以月供形式入市。

祺祺： 不過上周有大行出報告，話睇淡商品價格嘅短期走勢喎。

　鄭： 可能佢哋只在意市場供求，未考慮到類似黃金呢啲資源可作為另類貨幣嘅因素。事實上喺量化寬鬆貨幣政策下，投資者都會揸金。

候加息吸納內房股

祺祺： 咁有邊啲股份係避之則吉？

　鄭： 好似內地食品股咁，雖然員工薪金上升，但企業可能受壓於政府而未能加價，而電力股及化肥股嘅漲幅亦會受制，同樣被睇淡。雖然呢啲行業股份偶有反彈，但始終未能持續升勢，投資者應該散貨喇。

祺祺： 內地發改委早前約咗24個行業協會嘅高層會面，要求佢哋暫緩漲價，承諾唔加價嘅行業點會有運行！至於成日畀政策打壓嘅內房股，亦唔被睇好。

　鄭： 但我覺得內房股唔係要沽嘅對象，呢個板塊經歷咗長時間調整，通脹加劇亦有利資產投資回報表現。雖然依家仲未係入市時機，但可待中央加息後分段吸納大型內房股。

4.3%散戶借孖展抽匯賢

本港首隻人民幣新股匯賢產業信託（87001）正進行招股，認購反應不俗，銀行及證券行亦各出奇謀搶客。你有認購匯賢嗎？據今期《東方產經》網上民調，截至上周末晚上6時嘅結果顯示，4.3%人話有認購，並以孖展認購，13.8%人話只以現金認購，11.7%人話將會認購，其餘70.2%人就話唔會認購。

高妹、祺祺

若有料報畀高妹同祺祺或有嘢問，可電郵money.biz@opg.com.hk