市場熱線：廣汽有機會轉勢

經濟數據揭曉，三月通脹達5.4%，經濟增長9.7%，傳媒「消息」仲準過補習班啲名師。統計局話嚴厲譴責「洩密」事件，好似「賊喊捉賊」，邊個通水心知肚明，有關方面預早放風避免數據公布後對孖屐有太大衝擊，已經成為經濟數據嘅慣例。統計局又向樂觀方面睇，話三月CPI其實比二月環比下跌，但其實好多物價已被阿爺夾硬低，反映唔到實際情況。尋日人行又宣布上調存款準備金率0.5個百分點，都係喺市場預期之內，影響唔大。

TCL孖寶齊齊發威

窩輪市場連續出現兩單醜聞，窩輪近日成交跌得仲勁過主板成交。零售股繼續有得炒，祖國三月份社會消費品零售總額較前兩個月略為回升，消息算正面。大笨象（00005）帶頭又加按息，地主股偏軟，內房股亦有回吐。傳阿爺批准山西加電費，但電力股個別發展。

TCL孖寶（01070及02618）過去兩日威過威士忌，但同係做電話，中國無線（02369）繼續冇起色，金手指基金呢排猛咁沽貨，唯獨揸重貨嘅中國無線就好惜貨，係唔敢沽驚加重跌勢或其他原因？古勝烏卜卜。電腦同手機好講潮流，蘋果公司依家所向無敵，iPad一出，PC銷量即刻下跌，聯想（00992）股價亦一路低沉，聽講Apple仲諗住搞埋電視，到時連電視股都要諗計應戰。

古勝一向視水泥股同汽車股為博反彈佳選，依家個市並非反彈市，水泥股亦變成當炒股，但汽車股則明顯係落後大市，上個禮拜公布嘅三月賣車數據亦如預期般升幅放緩，老實講又唔算太差啫，同比仍有5.4%增長，喺咁多買車優惠取消兼有北京限購令等負面因素影響之下，仲有增長，已比老古年初嘅估計為佳。當然，每間車行嘅境況唔同，吉利（00175）首季賣車好過同業，股價有獎；比亞迪（01211）冇起色，股價受罰。但汽車股當中，最小波動嘅應係廣汽（02238），今年頭兩個月喺10蚊附近上落，上月二三線股股災亦最低跌到8.6元，上周五走勢有所好轉，但仍未能重上10蚊關口。

發A計劃增添炒味

廣汽計劃發A股合併廣汽長豐，係繼舊年換股合併駿威之後，實現整體上市嘅另一大動作。今次A股換股發行價係9.08元人仔，約合10.8港元。香港汽車股得隻濰柴（02338）係A+H上市，A股較H股溢價約兩成，如果廣汽A股上市大升嘅話，對H股應有帶動作用。

廣汽預測今年會賺多16%，當然同舊年冇得比，但喺眾多車股中已經算係唔錯嘅指標，往績PE唔夠9倍，雖然10蚊附近係成交密集區會有阻力，但不妨揸住等長線回報，而A股上市亦可能係催化劑。

戰報

金蝶國際（00268）+13%

金蝶上周五破位高收4.97元，古晨早於上周一已推介，於當日低位4.41元入市，一周計賺13%。

非凡中國（08032）+19%

帥哥於上月二十八日推介非凡中國，於當日低位0.31元上車，至上周五0.37元食胡，最多賺19%。

古勝