港交所（00388）主席夏佳理及行政總裁李小加喺呢個星期日會非常忙碌，要連踩兩場，因為當日俄羅斯總統梅德韋傑夫將大駕光臨參觀港交所，佢哋自然不容有失，要親自接待，而同日嘅賽馬又咁啱舉行「港交所盃」，兩人連趕兩場，唔忙到出煙就出奇。
梅德韋傑夫喺今、明兩日將率領龐大經貿代表團訪問香港，呢次係俄國元首歷史上首次訪港，故別具意義。
今次梅德韋傑夫參觀港交所，聽聞保安十分嚴密，不過好彩當日唔係交易日，交易大堂應該比較少人。國家領導人前來參觀，港交所一向會送贈靚冧巴嘅「紅衫仔」，唔知今次梅德韋傑夫會收到件乜嘢幸運數字嘅紅衫仔呢？
至於「港交所盃」，夏佳理鍾意跑馬就係人都知，今次呢場盃賽安排喺第8場跑，身為賽馬發燒友嘅佢，唔知到時會唔會有斬獲呢？
余絲韻