近期獲「四叔」李兆基不斷增持股份嘅恒地（00012），尋日出咗最新年報，絲絲梗係要第一時間八吓佢哋嘅高層人工有幾多啦！
睇番年報，最高人工依然係四叔嘅得力助手——恒地副主席林高演，不過唔知係咪人工已經好高嘅關係，去年總酬金與○九年比較，只係加得萬幾蚊，總數係3,651.5萬元，其中花紅部分就較○九年少咗21.6萬元。有幾位恒地執董嘅花紅亦比○九年少咗，令佢哋嘅總酬金加幅普遍只有2%至5%。
四叔嘅兩個乖仔李家傑及李家誠，總酬金就較○九年多咗約4%，分別有1,541.1萬元及1,321.7萬元；至於四叔嘅女婿李寧，總酬金只係加咗2%。不過，四叔去年嘅總酬金就加咗240萬元，有成1,525萬元，加幅達18%。
另外，四叔本自傳已經完成咗，佢正陸續寄畀各好友，最窩心嘅係，四叔附上親筆信一封，佢話自從九七年出咗《李兆基博士傳記》後，依家再出埋延續篇，記錄咗過去13年嘅經歷，希望作為年輕一代立身、立業嘅參考。
余絲韻