基金顧問公司ISS建議港交所（00388）嘅股東，喺下周三舉行嘅股東周年大會上向現任董事李君豪投反對票，但原來港交所已出信予包括政府在內嘅五十大股東，呼籲佢哋支持通過所有議案，即係包括埋支持李君豪連任。李君豪本身亦不敢怠慢，親自打電話畀外資及本地股東拉票。李君豪誓保港交所董事席位，睇嚟ISS要踢佢出局並唔容易。
今次選舉本來冇候選人參選，兩位現任董事郭志標及李君豪應該可以「無驚無險」順利連任，但ISS繼○八年反對李君豪連任後，今年再次發功，建議股東投反對票，為李君豪連任添上不明朗因素。
李君豪就同絲絲呻，話ISS對佢唔公平，佢話自己喺○九年就海域事件喺高等法院進行法律程序中嘅被告身份已獲撤銷，反問唔通做過一家上市公司出事，以後就要列入「黑名單」，唔准再做董事咩？佢仲話如果公司刻意違規，根本係冇可能防範嘅。
○八年ISS反對李君豪連任，但當時佢仍喺政府支持下順利當選，相信今次政府亦會支持佢。不過李君豪仍未可掉以輕心，因為港交所董事選舉嘅玩法係，如果反對票多過支持票，仍然冇得做，並要由董事局推舉另外一個人出嚟做董事。
李君豪話自己做咗港交所董事11年，若成功連任，會繼續推動人民幣產品，加強與內地合作關係。
余絲韻