美麗華酒店最新年報顯示，李兆基以及佢嘅細仔李家誠喺公司「係咁易」收5萬蚊董事袍金，與○九年比較，四叔兩父子嘅董事袍金其實都冇乜點加過。四叔另有薪金、補貼及實物利益，都係5萬蚊，加埋即係全年收10萬大元，相對於佢收取以十億計嘅股息總數，真係蚊髀同牛髀。
公司仲公布咗5位酬金最高嘅僱員收入，呢5位高層總薪酬係1,147萬元，最高薪嗰位嘅年薪介乎450萬至500萬元，其餘4位都係介乎150萬至200萬元。有趣嘅係，○九年最高薪嘅員工年薪係250萬至300萬，如果係同一個人，即係話加薪接近一倍！
余絲韻